NAJČITAJEME ČLANKY

Kto je neprijateľèm Rosiji?

V vrěmeně rosijskih prėdvybornyh debat, prezidentské kandidaty Mihail Dmitrijevič Prohorov i Vladimir Voľfovič Žirinovskí ne byli sòglåsné ob tòm, kto sųt potencialnymi prijateľami i neprijateľami ih krajiny. Miliarder Prohorov nastajival, že Rosiji je treba dalějšá integracija s Eùropòjų, ale Žirinovskí, prėdsědateľ nacionalističnòj Liberalno-Demokratičnòj Partiji Rosiji, izstųpal za blizkějšé s`vęzki s slovjanskimi bratami Ukrajinòjų i Běloruśjų i prėduprėđal od neprijateľev, na priměr zapadnyh dŕžav, Kitaja i Japoniji.

"Tutčasno tri globalné srėdiščja formujųt sę: S`jediňené Štaty s Latinskòjų Amerikòjų, Kitaj s Indijèjų i inymi azijatskimi krajinami, i Rosija s Eùropòjų," s`kazal Prohorov. Ni Rosija ni Eùropa ne bųdųt v staně stojatì licòm protiv konkurenciji v novòm světovòm porędkě, i za to on zakľučil, že "Eùropa je našim strategičnym partneròm." Je treba, čoby Rosija i Eùropejská Unija zakončili vizy i s`tvorili jediný ekonomičný prostor — moćnó ekonomičnó prostrånstvo.

V odnošeňju k južnym sųsědam Rosiji, Prohorovova politika byla by točno protivná: strågějšé granicné kontroli i regulacija viz, čoby unemožlivitì tṙgovjų narkotikami i nezakonnó prėseleňje. "To je jediná pravá politika dľa našèj krajiny," on dodal. Prohorov s`kazal, že nedemokratičné i neprijateľské režimy, gde ľudské prava narušajųt sę, na priměr Iran i Sirija, sųt potencialnymi neprijateľami Rosiji. "Ale nam je vśegda treba råzvažatì interesy Rosiji. Zagraničná politika je instrumentòm našègo råzviťja."

Žirinovskí s`kazal, že S`jediňené Štaty, ih eùropejské sòjųzniki, Kitaj, Japonija i Turcija sųt neprijateľami Rosiji za to, že oni hčųt "izničitì našų krajinų". Među prijateľami Rosiji on imenoval Ukrajinų, Kazahstan, Běloruś, Bòlgarijų, Armenijų i "Korejų".

(nms)

nedělja, 18. November 2018

PARTNERI

NAŠ PROJEKT




BESEDUJTE S NAMI NA FACEBOOKU

TECHNIČSKA OBSLUGA

PUBLIKOVANJE ČLANKOV